Greqi– Dy vëllezër, 19 dhe 23 vjeç, janë sulmuar nga katër persona në orët e para të së premtes, teksa po ecnin në Dekelia Avenue, në zonën e quajtur Nea Philadelphia.
Sipas raportit të protothema.gr, sulmi i autorëve ka ndodhur i paprovokuar dhe papritur.
Dy të rinjtë kanë parë një makinë të vogël të zezë, e cila ndaloi para tyre dhe prej saj dolën 4 persona të veshur me të zeza, kapuç, shkopinj hekuri dhe thika.
Pa shkëmbyer asnjë fjalë me të rinjtë, sulmuesit i goditën ashpër me shkopinj në kokë.
Më pas ata goditën dy herë me thikë 19-vjeçarin dhe një herë vëllain e tij 23-vjeçar dhe vazhduan t’i rrihnin pa mëshirë.
Dokumentet nga sulmi i paraqitur nga protothema.gr janë tronditëse dhe vërtetojnë se dy të rinjtë kanë shpëtuar për mrekulli.
Pas sulmit, autorët i shanë duke përmendur emrin e grupit, hipën në makinën e zezë dhe u larguan.
Ngjarja tashmë po hetohet nga Departamenti i Dhunës dhe po mblidhen provat për identifikimin dhe arrestimin e autorëve./vizionplus.tv
