Lufta mes bandave kriminale në Greqi ka lënë pas disa viktima. Rasti më i fundit ishte pak kohë më parë, ku në 30 sekonda, 90 plumba kallashnikovi i morën jetën bosit mafioz Vangjelis Zabunis 44-vjeç.
Policia ka paralajmëruar se do të ketë arrestime të tjera, si vijimi i punës së tyre për të shkatërruar bandat kriminale.
Mediat greke bëjnë me dije se autoritetet kanë zbuluar së fundmi se paratë e pista investoheshin në vila luksoze, por edhe në biznese.
Personat që pastronin para dyshohet se ishin kontrabandistë të cigareve, të cilët janë anëtarë të bandave kriminale.
Po ashtu, policia ka vënë në shënjestër të hetimit 500 pika karburanti nga 5500 që operojnë në Greqi, për të cilat ka dyshime të forta se janë në pronësi të anëtarëve të mafiozëve.
Vlera e parave që mafiozët kanë pastruar brenda një viti nga karburantet dhe kontrabanda e cigareve kap vlerën e 1.5 miliardë euro.
Por pas një seri vrasjesh mes tyre dhe pastrim të madh parash, policia e ka një tablo të qartë. Protothema shkruan se autoritetet e kanë të qartë se kush janë anëtarët e bandave mafioze, teksa shton se për vrasje ata marrin persona të huaj, për pak para. Në krimet e tyre, ata përdorin gjithmonë makina të vjedhura në shtete të tjera.
“Lufta civile” e mafias greke, me vrasjet e “kumbarëve” nisi në maj 2017 me ekzekutimin e 48-vjeçarit Vassilis Grivas , i cili kishte një të kaluar shumë të rëndë kriminale, i cili, megjithatë, kishte vetëm një dënim në shtatë vjet burg dhe ai u lirua pasi kreu një pjesë të dënimit. Grivas u vra jashtë shkollës së djalit të tij në Glyka Nera. Lufta vijoi më tej edhe me ekzekutimin e personave të tjerë që ishin në krye ta bandave kriminale./vizionplus.tv
