Klodjana Agaj
Ushtria izraelite ka bërë thirrje për evakuimin e civilëve nga lagjet lindore të Rafah dhe u ka thënë atyre të drejtohen në një zonë humanitare më të gjerë.
Forcat e Mbrojtjes të Izraelit (IDF) thanë në një deklaratë se po bënte thirrjen për evakuim përmes njoftimeve, mesazheve me tekst, telefonatave dhe transmetimeve mediatike në arabisht.
IDF tha se operacioni ishte i përmasave të kufizuara dhe vlerësoi se do të duhej të lëvizte rreth 100,000 njerëz.
Forcat izraelite të mbrojtjes kanë lëshuar fletushka në zonën lindore të Rafahut duke u bërë thirrje civilëve të evakuohen. Ka dy versione të ndryshme të fletushkave – të kuqe dhe blu.
Në versionin e kuq, IDF u thotë banorëve të zonave specifike në Rafah ku forcat e tyre do të operojnë dhe paralajmëron kushdo që gjendet pranë organizatave terroriste rrezikon veten dhe anëtarët e familjes së tyre.
Aty u bëhet thirrje qytetarëve të lëvizin në zonën humanitare në al-Mawasi dhe të shmangin drejtimin në veri të Wadi Gazës, ose afër gardheve të sigurisë lindore dhe jugore.
Versioni blu, ndërkohë, njofton zgjerimin e zonës ku thotë se ndihma humanitare do të vazhdojë.
Familjet fillojnë të largohen nga Rafahu lindor
Pasi ushtria izraelite u bëri thirrje 100,000 civilëve palestinezë që të evakuojnë pjesë të Rafahut lindor, disa banorë të Gazës kanë filluar të largohen nga qyteti.
Familjet janë fotografuar duke u larguar nga qyteti jugor në orën e fundit.
Dështimi i armëpushimit
Lajmi vjen një ditë pasi ministri i mbrojtjes i Izraelit, Yoav Gallant, tha se nëse nuk arrihet një marrëveshje armëpushimi, Izraeli do të nisë në të ardhmen shumë të afërt një ofensivë në Rafah, një bastion i raportuar i Hamasit ku rreth një milion njerëz të zhvendosur nga diku tjetër në Gaza kanë kërkuar strehim.
Izraeli ka paralajmëruar prej muajsh se planifikon të dërgojë trupa në Rafah, qyteti jugor në kufi me Egjiptin.
Në një fjalim televiziv të dielën, kryeministri izraelit Benjamin Netanyahu hodhi poshtë edhe një herë kërkesat e Hamasit për përfundimin e luftës në Gaza, duke thënë se çdo armëpushim i përhershëm do të lejonte që grupi të qëndronte në pushtet dhe të përbënte një kërcënim të vazhdueshëm për Izraelin.
Duke folur një ditë pasi mijëra njerëz u mblodhën përsëri në Tel Aviv duke kërkuar një marrëveshje për lirimin e robërve të mbetur izraelitë, Netanyahu tha gjithashtu se qeveria e tij kishte qenë duke punuar për të formuluar një marrëveshje që do të kthente pengjet.
Zyrtari i lartë i Hamasit, Sami Abu Zuhri i ka thënë agjencisë së lajmeve Reuters se urdhri i evakuimit të Rafahut të Izraelit përpara një ofensive të pritshme është një “përshkallëzim i rrezikshëm që do të ketë pasoja”.
Pasojat e ofensivës Rafah do të ishin “thjesht katastrofike”:
Zëdhënësi i agjencisë së OKB-së për refugjatët palestinezë (UNRWA), Jonathan Fowler, foli të hënën me Al Jazeera nga Jeruzalemi Lindor.
“Ne jemi në një situatë ku çdo përparim në shkallë të gjerë nga forcat izraelite në Rafah do të nënkuptojë më shumë vuajtje dhe vdekje.
Pasojat do të ishin shkatërruese për popullsinë e Rafahut që është gjashtë herë më e madhe se popullsia e paraluftës – gjysma e 1.4 milionë njerëzve janë fëmijë. Shumica e këtyre njerëzve janë zhvendosur shumë herë tashmë. Sfida është e pakapërcyeshme në këtë fazë.
Minat e pashpërthyera duhet të pastrohen përpara se njerëzit të kthehen në një zonë dhe të jetojnë të sigurt.
Asnjë vend nuk është i sigurt në Rripin e Gazës, njerëzit janë zhvendosur vazhdimisht pa pushim. Edhe planet e emergjencës ofrojnë pak ngushëllim. Pasojat nga një ofensivë e tillë do të ishin thjesht katastrofike”, tha ai.
Qyteti jugor i Gazës i mbushur me 1.5 milionë banorë
Rafah, i cili kishte një popullsi prej rreth 270,000 banorësh përpara fillimit të luftës në Gaza më 7 tetor, tani pret shumicën e 2.3 milionë banorëve të Gazës para luftës.
Organizata Botërore e Shëndetësisë thotë se më shumë se 1.2 milionë njerëz janë strehuar në qytetin që ndodhet në skajin më jugor të Gazës, në kufirin me Egjiptin.
Mjekët pa Kufij vlerësojnë se më shumë se 1.5 milionë njerëz janë aktualisht të bllokuar në Rafah, pasi janë larguar nga zonat veriore dhe qendrore të enklavës mes operacioneve tokësore të Izraelit dhe sulmeve ajrore.
Ushtria izraelite u kërkoi njerëzve në zona të caktuara lindore të Rafahut që gradualisht të zhvendoseshin në “zonën humanitare” të caktuar që ndodhet në jugperëndim të enklavës.
Në deklaratë thuhej se ushtria ka zgjeruar zonën humanitare në al-Mawasi për të akomoduar nivelet e rritura të ndihmave që dërgohen në Gaza.
Megjithatë, zonat e mëparshme të evakuimit të përcaktuara nga ushtria nuk kanë qenë të sigurta për njerëzit e zhvendosur duke pasur parasysh shembujt e mëparshëm të sulmeve dhe vrasjeve nga forcat izraelite në të kaluarën.
SHBA informohet për ofensivën
Ministri izraelit i Mbrojtjes, Yoav Gallant i ka thënë homologut të tij amerikan, Sekretarit të Mbrojtjes, Lloyd Austin, se Izraelit nuk i ka mbetur asnjë zgjidhje veçse të nisë ofensivën e tij në Rafah.
Në një telefonatë gjatë natës, Gallant përditësoi Austin për sulmin e raketave të së dielës të nisur nga Rafah në një pozicion të ushtrisë izraelite në kufi, tha zyra e tij.
Ministri raportohet se ka fajësuar Hamasin për refuzimin e çdo propozimi që do të lejonte një propozim të përkohshëm për armëpushim.
Zyrtarë të paidentifikuar amerikanë i thanë agjencisë së lajmeve Associated Press se Izraeli i informoi zyrtarët e administratës Biden këtë javë për një plan për të evakuuar civilët palestinezë përpara një operacioni të mundshëm ushtarak në qytetin jugor të Gazës, Rafah.
Zyrtarët thanë se plani i detajuar nga izraelitët nuk e ndryshonte pikëpamjen e administratës amerikane se një operacion në Rafah do të vinte në rrezik shumë civilë të pafajshëm palestinezë.
Rajonalët dhe anëtarët e komunitetit ndërkombëtar kanë shprehur gjithashtu kundërshtimin e tyre ndaj planeve të Izraelit për të pushtuar Rafahun, i cili është bërë streha e fundit për palestinezët e zhvendosur nga lufta. /vizionplus.tv
