Kryeministri hungarez Viktor Orban u takua me liderin kinez Xi Jinping në Pekin të hënën, disa ditë pas një vizite mjaft të komentuar në Moskë dhe një tjetër në Kiev, të cilën lideri europian i ekstremit të djathtë e përshkroi si një “mision paqeje”.
Orban, i cili është kritikuar gjerësisht në Perëndim për pozicionimin e tij miqësor ndaj Rusisë në mes të sulmit të Moskës në Ukrainë, postoi një foto të mbërritjes së tij në një aeroport të Pekinit me mbishkrimin “Misioni i Paqes 3.0” në platformën e mediave sociale X.
“Xi dhe Orban do të diskutojnë çështjet me shqetësim të përbashkët”, tha të hënën Ministria e Jashtme e Kinës në deklaratën e saj të parë për vizitën e paparalajmëruar më parë. Të dy udhëheqësit filluan takimin e tyre në bujtinë shtetërore Diaoyutai të hënën në mëngjes, njoftuan mediat shtetërore kineze.
Vizita e Orban vjen një ditë përpara fillimit të samitit të NATO-s në Uashington, ku presidenti i SHBA Joe Biden do të presë liderët nga blloku, i cili përfshin Hungarinë, dhe do të mbledhë mbështetje të vazhdueshme për mbrojtjen e Ukrainës.
Kina gjithashtu pritet të jetë në axhendën e atij takimi, pasi udhëheqësit e NATO-s janë bërë gjithnjë e më të alarmuar për atë që ata thonë se është mbështetja e saj për përpjekjet luftarake të Moskës përmes ofrimit të mallrave me përdorim të dyfishtë dhe mbështetjes tjetër ekonomike dhe diplomatike.
Pekini, aleati më i rëndësishëm diplomatik i Moskës, ka thënë se nuk ka ofruar armë për asnjërën palë të konfliktit dhe ka mbrojtur atë që i quan kontrollet e tij të rrepta mbi eksportet me përdorim të dyfishtë.
