Kombet e Bashkuara bënë thirrje sot për t’i dhënë fund dhunës midis Izraelit dhe lëvizjes shiite libaneze Hezbollah , e cila është përshkallëzuar në gjashtë muajt e fundit që nga shpërthimi i luftës në Rripin e Gazës, duke nënvizuar frikën e një përshkallëzimi dhe duke bërë thirrje për hapësirë për diplomaci.
Që nga shpërthimi i luftës në Rripin e Gazës midis Izraelit dhe Hamasit më 7 tetor, pothuajse çdo ditë ka pasur shkëmbime zjarri midis ushtrisë izraelite dhe Hezbollahut, i cili thotë se po vepron në mbështetje të organizatës palestineze.
“Prej gjashtë muajsh, shkëmbimet e zjarrit kanë vazhduar pa ndërprerje nga njëra dhe nga ana tjetër e vijës blu ,” tha koordinatorja speciale e OKB-së për Libanin Joana Vroneka.
Ushtria izraelite njoftoi dje se ka përfunduar një “fazë të re” në përgatitjen e “luftës” në kufirin e vendit me Libanin .
“Zgjerimi progresiv i fushës dhe shkallës së konflikteve (…) rrit ndjeshëm rrezikun e gjykimeve të gabuara dhe përkeqësimin e mëtejshëm të një situate tashmë alarmante,” paralajmëruan zyrtarët e OKB-së.
Më shumë se 10,000 trupa të UNIFIL janë dislokuar përgjatë vijës blu të përcaktuar nga OKB midis Libanit dhe Izraelit, por nuk janë në gjendje të frenojnë dhunën.
Hezbollahu ka shtuar sulmet e tij ndaj pozicioneve izraelite përtej kufirit dhe ushtria izraelite po përgjigjet me sulme që synojnë pozicione gjithnjë e më thellë në tokën libaneze, si dhe figura të lëvizjes libaneze.
Të paktën 363 persona, kryesisht luftëtarë të Hezbollahut, por edhe të paktën 70 civilë janë vrarë në Liban. Në Izrael janë vrarë 18 persona – dhjetë ushtarë dhe tetë civilë.
Zyrtarët e OKB-së vlerësuan se është “kritike” të ketë një zgjidhje politike bazuar në “zbatimin e plotë të rezolutës 1701 të Këshillit të Sigurimit”.
Vendimi i dha fund luftës së vitit 2006 midis Hezbollahut dhe përcakton se vetëm ushtria libaneze dhe UNIFIL mund të vendosen në Libanin jugor./vizionplus.tv/
