Pavarësisht presionit të madh ndërkombëtar të ushtruar për të arritur një marrëveshje për një armëpushim të ri midis Izraelit dhe Hamasit, negociatat e djeshme mes dy palëve në Kajro rezultuan të pafrytshme. Bisedimet, megjithatë, sipas raportimeve të mediave amerikane dhe izraelite, do të vazhdojnë.
Delegacionet e Katarit, Egjiptit, SHBA-së dhe Izraelit ranë dakord të zgjasin bisedimet edhe për tre ditë të tjera, raportoi New York Times, duke cituar një burim nga qeveria egjiptiane. Ato do të vazhdojnë në një nivel më të ulët.
Gazeta Times of Israel foli gjithashtu për një zgjatje të bisedimeve.
Delegacioni izraelit, i cili përfshinte shefat e inteligjencës David Barnea të Mossad dhe Ronen Barr të Shin Bet, u kthye në Izrael, sipas të njëjtës gazetë, e cila citoi një burim në zyrën e kryeministrit izraelit Benjamin Netanyahu.
Egjipti, i cili tradicionalisht ka luajtur një rol ndërmjetësues në konfliktin izraelito-palestinez, priti dje shefat e inteligjencës amerikane dhe izraelite, si dhe kreun e qeverisë së Katarit, për bisedime për shpalljen e një armëpushimi të ri që do të lejonte lirimin e pengjeve në Rripin e Gazës.
Bisedimet midis drejtorit të CIA-s, William Burns, shefit të Mossad-it, David Barnea, kryeministrit të Katarit, Mohammed bin Abdel Rahman al-Thani dhe zyrtarëve egjiptianë kanë qenë pozitive dhe do të vazhdojnë gjatë tre ditëve të ardhshme, raportoi gjithashtu më herët rrjeti televiziv Al-Qaira, i cili besohet gjerësisht se ka lidhje me shërbimin e inteligjencës egjiptiane. /vizionplus.tv
