Përmbytjet që kanë pushtuar ditët e fundit Rusinë po kërcënojnë rajonin Kurgan në jug të vendit, duke vënë në rrezik më shumë se 19,000 persona, njoftoi sot agjencia shtetërore e lajmeve, disa ditë pas përmbytjeve që detyruan mijëra qytetarë të largohen nga shtëpitë e tyre në rajonin e Urals.
Agjencia e lajmeve TASS raporton se të paktën 4,000 shtëpi mund të preken gjithashtu nga përmbytjet.
Përmbytjet, më të këqijat në dekada, kanë goditur një sërë rajonesh ruse në Urale dhe Siberi ditët e fundit, si dhe pjesë të Kazakistanit fqinj, pasi rryma e lumit të tretë më i madh në Evropë çau një digë.
Russia: Today, a 3rd breach of the dam in Orsk resulted in even more flooding. https://t.co/ZWC3HBuEKW pic.twitter.com/5vuFfAY52B
— Igor Sushko (@igorsushko) April 8, 2024
Në qytetin e Orskut , në rajonin e Orenburgut, banorët i kanë kërkuar ndihmë Presidentit Vladimir Putin , duke u ankuar se zyrtarët e tyre lokalë nuk kanë bërë sa duhet për të ndihmuar në përballimin e përmbytjeve më të këqija të regjistruara ndonjëherë në Rusi.
Kreu i Ministrisë së Emergjencave të Rusisë, Alexander Kurenkov, shkoi sot në rajon për të vlerësuar situatën pasi u udhëzua nga Putin, tha ministria përmes aplikacionit Telegram.
Kurenkov do të vizitojë gjithashtu rajonet Kurgan dhe Tyumen në Urale, shtoi ministria. Niveli i lumit Ural , i cili buron nga malet Ural dhe derdhet në Detin Kaspik, u rrit me disa metra brenda disa orësh të premten dhe çau një digë në qytetin e Orsk, 1800 kilometra në lindje të Moskës./vizionplus.tv/
