Një lojtar i ‘Powerball’ në Arkansas fitoi një çmim të madh prej 1.817 miliardë dollarësh (1.34 miliardë paund), në një short xhakpoti në prag të Krishtlindjeve, duke e bërë atë çmimin e dytë më të madh të fituar ndonjëherë në lotari.
Bileta e vetme fituese përputhej me të gjashtë numrat – 4, 25, 31, 52, 59 dhe Powerball-in e kuq 19 – duke i dhënë fituesit mundësinë e marrjes së një pagese të menjëhershme prej 834.9 milionë dollarësh, sipas rregullave.
Kjo shënon vetëm herën e dytë që një çmim i madh i Powerball është fituar nga një biletë e shitur në Arkansas, sipas operatorit të lotarisë. Powerball nuk e identifikoi fituesin.
Çmimi më i madh me një biletë të vetme mbetet xhekpoti prej 2.04 miliardë dollarësh i fituar në vitin 2022 nga një lojtar në Altadena të Kalifornisë.
Për të fituar xhekpotin, një mbajtës i biletës së lotarisë duhet të përputhë të pesë topat e bardhë dhe Powerball-in e kuq të zgjedhur gjatë një shorti.
Biletat për lotarinë kushtojnë 2 dollarë secila – dhe shanset për të fituar xhekpotin janë 1 në 292.2 milionë, sipas organizatorëve të lojës.
Një fitues ka mundësinë të zgjedhë një pagesë të njëhershme ose të marrë shumën e plotë në një pension vjetor të paguar gjatë 29 viteve, por shumica e fituesve zgjedhin opsionin e pagesës paraprake në para të gatshme.
Loja, e cila filloi në vitin 1992, luhet në 45 nga 50 shtetet e SHBA-së, në kryeqytetin e Uashingtonit dhe në territoret amerikane të Porto Rikos dhe Ishujve të Virgjër.
Fitimet i nënshtrohen taksave federale prej 24% deri në 37% dhe, në shumicën e rasteve, taksave shtetërore.
