Sekretari amerikan i Shtetit, Anthony Blinken, vazhdon turneun e tij diplomatik në Lindjen e Mesme. Ditën e sotme ai ndodhet në Jordani, ku kërkon të sigurojë që konflikti midis Izraelit dhe Hamasit në Rripin e Gazës të mos përhapet dhe të shmanget “një cikël i pafund dhune”.
Blinken, i cili mbërriti në Aman të shtunën mbrëma, do të zhvillojë bisedime me Mbretin Abdullah II të Jordanisë dhe do të vizitojë një qendër të Programit Botëror të Ushqimit (WFP), tha një zyrtar i lartë amerikan i afërt me ministrin.
Në deklaratën e tij të shkurtër mbrëmë nga aeroporti Chania në Kretë pas takimit të tij me kryeministrin grek Kyriakos Mitsotakis, Blinken theksoi se “ne duhet të sigurohemi që konflikti të mos përhapet”.
“Një nga shqetësimet reale është kufiri midis Izraelit dhe Libanit dhe ne duam të bëjmë gjithçka që është e mundur për të siguruar që të mos ketë përshkallëzim”, shtoi ai.
Lëvizja shiite e Libanit, Hezbollah lëshoi dhjetëra raketa në veri të Izraelit dje, një sulm që e përshkroi si një “përgjigje të parë” ndaj vdekjes së komandantit të dytë të Hamasit, Saleh al-Aruri, në një sulm që fajësoi Izraelin në Bejrut të martën.
“Ne duam të sigurohemi që vendet me të njëjtin mendim të përdorin lidhjet e tyre, ndikimin e tyre, marrëdhëniet e tyre me disa nga aktorët e përfshirë për të mbajtur gjërat nën kontroll, për t’u siguruar që konflikti të mos përshkallëzohet”, vuri në dukje Blinken.
Madje ai iu referua rolit “jetik” që mund të luajë Turqia në këtë drejtim, pas takimit dje në Stamboll me presidentin turk Rexhep Tajip Erdogan.
Blinken, vendi i të cilit është aleati kryesor politik dhe ushtarak i Izraelit, këmbëngul se është e rëndësishme të rritet ndihma humanitare për palestinezët në Gaza, “të reduktohen viktimat civile, të punohet drejt një paqeje të qëndrueshme rajonale dhe të shkohet drejt krijimit të një shteti palestinez”.
Pasojat e luftës,rindërtimi dhe qeverisja e Gazës, do të jenë gjithashtu në qendër të bisedimeve të sekretarit të shtetit të SHBA-së me partnerët e tij arabë, megjithëse në këtë fazë ata po bëjnë thirrje për një armëpushim fillimisht.
Pas Jordanisë, Blinken do të shkojë në Katar, i cili luajti një rol ndërmjetësues në armëpushimin e rënë dakord në mes të nëntorit midis Izraelit dhe Hamasit.
Blinken do ta përfundojë ditën e tij në Abu Dhabi, përpara se të vizitojë Arabinë Saudite dhe Izraelin, ku pret, siç tha ai, se bisedimet “nuk do të jenë të lehta”.
Lufta midis Izraelit dhe Hamasit shpërtheu pas sulmit të paprecedentë të lëvizjes palestineze më 7 tetor, i cili mori jetën e rreth 1,140 njerëzve.
Që atëherë, operacionet ushtarake të Izraelit në Rripin e Gazës kanë vrarë të paktën 22,722 njerëz, shumica prej tyre gra dhe fëmijë./vizionplus.tv
