Komisioni Evropian pritet të vendosë tarifa nga nesër, e premte, për një sërë importesh nga Ukraina, si vezë dhe sheqer, sipas një raporti të gazetës britanike Financial Times.
Në thelb, do të jetë një rivendosje e tarifave që u hoqën për shkak të pushtimit rus të Ukrainës.
Komisioni po nxiton të rivendosë masën për kufizimin e importeve të produkteve ukrainase përmes mekanizmit të kontrollit të hyrjes së mallrave jashtë BE-së, e cila synon t’i përgjigjet protestave të forta të fermerëve të vendeve anëtare të BE-së.
Sa i përket vezëve, importet nga BE u rritën me tre të katërtat vitin e kaluar dhe vazhduan të rriten në fillim të këtij viti, me Ukrainën furnizuesin kryesor, sipas të dhënave evropiane.
Industria evropiane e vezëve është ankuar se fluksi i furnizimeve më të lira të Ukrainës ka penguar rimëkëmbjen e prodhimit nga shpërthimet e gripit të shpendëve në vitet e fundit që kanë goditur tufat e shpendëve.
Pak ditë më parë, Komisioni Evropian njoftoi vendosjen e tarifave për importet e tërshërës nga Ukraina, pasi ato kaluan kufirin e vendosur nga evropianët. Tarifat korrespondojnë me 89 euro për ton tërshërë dhe do të jenë në fuqi të paktën deri në qershor 2025.
Tarifat për vezët dhe sheqerin nga Ukraina pritet të jenë të njëjta, duke filluar nga nesër e premtja, ndërsa këtë javë Bashkimi Evropian ka hapur negociatat e anëtarësimit me Kievin. Siç thekson Financial Times, këto tarifa nxjerrin në pah se sa të vështira do të jenë këto negociata të anëtarësimit.
