Pas deklaratës së ish-presidentit të RMV-së, Stevo Pendarovski se gjuha shqipe është zyrtare në Maqedoni dhe se nëse kontestohet kjo do të hapen probleme, sot kanë reaguar nga Gjykata Kushtetuese, shkruan Telegrafi Maqedoni.
Nga Gjykata Kushtetuese thonë se pas pyetjeve nga disa media në lidhje me deklaratën e bërë nga ish-Presidenti Stevo Pendarovski, Gjykata Kushtetuese sqaron se në emisionin “Këndi i Debatit” në “Tevë1”, të transmetuar më 13 mars 2026, ish-Presidenti i vendit, Stevo Pendarovski, paraqiti informacione të pasakta në lidhje me një çështje që ishte në shqyrtim para Gjykatës Kushtetuese.
Pendarovski: Gjuha shqipe është zyrtare në Maqedoni, do të jetë problem i madh nëse Gjykata Kushtetuese do ta shfuqizojë
“Konkretisht, u tha se “dikush, gjoja një qytetar i zakonshëm, i panjohur për publikun, paraqiti një kërkesë në Gjykatën Kushtetuese duke kundërshtuar Ligjin për Përdorimin e Gjuhëve, domethënë se ai nuk është në përputhje me Kushtetutën dhe kërkon anulimin e atij Ligji. Pra, meqenëse jetojmë në një vend të vogël, të gjithë besojnë se pas atij qytetari të zakonshëm duhet të ketë një parti politike. Tani papritmas, pas disa vitesh praktikimi të atij Ligji, dikush po thotë se duhet ta rishikojmë atë Ligj, të konsultohemi me Gjykatën Kushtetuese dhe se “Gjykata Kushtetuese tashmë ka caktuar një seancë dëgjimore për këtë çështje në muajt në vijim dhe mund të jetë një problem i madh nëse Gjykata e anulon atë Ligj”.
Gjykata Kushtetuese thekson se deklarata të tilla nuk janë të sakta dhe nuk korrespondojnë me situatën faktike. Konkretisht, nuk bëhet fjalë për një “parashtrues të panjohur për publikun”, por për 13 iniciativa të paraqitura nga 45 paraqitës, përfshirë parti politike, profesorë, avokatë, shoqata dhe qytetarë. Ky informacion është shpallur publikisht nga Gjykata në disa raste vitet e fundit, si pjesë e angazhimit të saj për transparencë. Mund ta lexoni në linkun e mëposhtëm: https://ustavensud.mk/archives/31152
Gjykata gjithashtu thekson se, duke marrë parasysh ndërgjegjësimin e publikut për këtë çështje dhe nivelin e lartë të interesit publik, është veçanërisht e rëndësishme që figurat publike ose personat që kanë mbajtur poste të larta shtetërore dhe mund të kontribuojnë në krijimin e perceptimit publik, të përmbahen nga paraqitja e informacionit të pasaktë ose të paverifikuar, pavarësisht nëse ai është i destinuar për publikun vendas apo ndërkombëtar.
Për më tepër, paragjykimi i vendimit të Gjykatës, si dhe bërja e supozimeve rreth pasojave të mundshme të vendimit, është një qasje e papërshtatshme që mund të ndikojë jo vetëm në reputacionin e Gjykatës, por edhe në perceptimin e rendit juridik dhe integritetin institucional të shtetit”, thuhet në reagimin e Gjykatës Kushtetuese të Maqedonisë së Veriut.
Nga atje njoftojnë publikun se nuk është marrë asnjë vendim në këtë rast specifik dhe se Gjykata do të veprojë në përputhje me Kushtetutën në këtë rast, si në të gjitha të tjerat, bazuar në të gjitha faktet, argumentet dhe normat ligjore relevante./Telegrafi/
