Kryetarja e Kuvendit të Shqipërisë, Elisa Spiropali. ka reaguar pas thirrjeve antishqiptare ditën e djeshme në një ndeshje basketbolli në Kumanovë, informon Telegrafi Maqedoni.
Spiropali shkruan se gjuha e urrejtjes nuk ka vend në asnjë hapësirë publike, duke shtuar se shqiptarët mbetën të palëkundur në promovimin e bashkëjetesës pa ndasi.
Reagimi i plotë:
Ngjarja e djeshme në Kumanovë, ku një ndeshje basketbolli u njollos nga thirrje ekstremisht fyese dhe përjashtuese ndaj shqiptarëve, është e papranueshme dhe një kujtesë se rruga drejt një shoqërie të drejtë, gjithëpërfshirëse dhe të respektit të ndërsjellë kërkon angazhim të pandërprerë.
Gjuha e urrejtjes që nxit dhunën, konfliktin etnik dhe racizmin, nuk ka vend në asnjë hapësirë publike, e aq më pak në sport, që në thelb të tij mbart frymën e bashkimit, të bashkëpunimit, të lojës së ndershme dhe të respektit ndaj tjetrit.
Vlerësoj reagimin e institucioneve të RMV, duke kërkuar njëkohësisht reagim edhe më fortë publik të zyrtarëve më të lartë të vendit mik.
Bashkëjetesa ndëretnike në Maqedoninë e Veriut është një vlerë e përbashkët në rrugën europiane, që duhet ruajtur dhe kultivuar me përgjegjësi nga të gjithë faktorët në rajon, përmes veprimit, qëndrimeve dhe shembullit.
Sjellja korrekte në fusha, në tribuna dhe në institucione flet shumë për vizionin tonë për të ardhmen.
Shqipëria dhe shqiptarët mbeten të palëkundur në promovimin e një bashkëjetese model dhe larg ndasive të dala mode e boje.
Thirrjet antishqiptare në Kumanovë, Spiropali: E papranueshme, gjuha e urrejtjes nuk ka vend në asnjë hapësirë publike appeared first on Telegrafi.
