Ministria e Arsimit dhe Shkencës ka shpallur konkursеt për bursa për nxënësit dhe studentët për vitin shkollor dhe akademik 2025/2026. Numri më i madh i bursave është i dedikuar për mbështetjen e nxënësve të regjistruar në drejtimet duale në arsimin e mesëm profesional – 1570 bursa. Për nxënësit në shkollat profesionale që ndjekin programe me kohëzgjatje trevjeçare janë parashikuar 150 bursa, thuhet në njoftimin e MSH-së.
“Ministria e Arsimit dhe Shkencës do të ndajë edhe 300 bursa për nxënës të shkollave të mesme të regjistruar në programe mësimore nga fushat: hotelieri dhe turizëm, pylltari dhe përpunim i drurit, ndërtimtari dhe gjeodezi, bujqësi–peshkatari dhe veterineri, makineri, tekstil dhe lëkurë, ndërsa 180 bursa do të jenë mbështetje për nxënës me nevoja të veçanta ndërsa 50 për nxënës – fëmijë pa prindër.
Për nxënësit e talentuar janë dedikuar 150 bursa, po aq edhe për nxënësit e talentuar – sportistë, ndërsa nxënësit e talentuar të arsimit të mesëm nga fusha e arteve mund të aplikojnë për 50 bursa.
Ministria e Arsimit dhe Shkencës do të ndajë gjithashtu 900 bursa për mbështetje sociale për nxënësit e shkollave të mesme publike, si dhe 1200 bursa për nxënësit romë të regjistruar në shkollat e mesme publike dhe private.
Edhe studentët mund të aplikojnë për kategori të ndryshme të bursave.
Për studentët nga kategoria sociale janë parashikuar 1.470 bursa. Për studentët që kanë arritur sukses të lartë gjatë studimeve, nga fushat shkencore të shkencave matematiko-natyrore, tekniko-teknologjike, bioteknike, mjekësore, shoqërore dhe humanitare, janë parashikuar 770 bursa, ndërsa për studentët e informatikës janë parashikuar veçmas 85 bursa”, thonë nga MSH./Telegrafi/
MSH: Janë shpallur konkurset për bursa, mbështetje për 7880 nxënës dhe studentë appeared first on Telegrafi.
