Numri një i futbollit në Shqipëri, Armand Duka, ka reaguar nëpërmjet një postimi në mediat sociale në lidhje me barazimin e kuqezinjëve të drejtuar nga Sylvinho me Serbinë (0-0) në Tiranë.
Duka e vë theksin te loja e kuqezinjëve dhe ajo që lojtarët e Shqipërisë treguan në fushë.
”Një ndeshje e bukur, që mund ta kishim fituar”, shkruan Duka në mediat sociale.
”Barazojmë 0-0 me Serbinë dhe ajo që na motivon më së shumti për të ardhmen është loja e bërë, vetëbesimi i lojtarëve, autoriteti i tyre në fushë.
I kishim të gjitha mundësitë për të marrë tre pikët, që do të kishin qenë të merituara nga ana jonë. Gjithsesi futbolli i tillë, jo gjithmonë prodhon rezultatin që meriton.
Përgëzime për djemtë e ekipit, për gjithçka dhanë në fushë, trajnerin Sylvinho dhe stafin teknik për punën e bërë për përgatitjen e ndeshjes dhe për mënyrën se si e drejtuan skuadrën sot.
Falënderojmë edhe tifozët, që sërish ishin në mbështetje të Kombëtares dhe besuan e i dhanë kurajo skuadrës për të marrë maksimumin në fushën e blertë.
Tani duhet të shohim përpara, ndeshja me Letoninë vjen shpejt dhe duhet të jemi gati për të që të japim më të mirën dhe të marrim tre pikët”, përfundoi Duka.
Shqipëria do të luajë takimin e radhës pas tre ditësh kur të udhëtojë në transfertën e Letonisë.
Reagon Armand Duka pas barazimit Shqipëri-Serbi / shkruan Gazeta Online Reporteri.net.
