Pas Luka Modric, tani Milan raportohet se po interesohet edhe për veteranin e Bayer Leverkusen, mesfushorin Granit Xhaka, për trajnerin e ri Max Allegri.
Është konfirmuar që është arritur marrëveshja me Modric për të nënshkruar kontratën dhe për të kryer ekzaminimet mjekësore javën tjetër, edhe pse ai është gati të festojë ditëlindjen e 40-të.
Kjo sepse Allegri gjithmonë ka vlerësuar përvojën te lojtarët e tij, më shumë sesa rinia dhe energjia, ndaj po shikohet edhe Xhaka.
Modric dhe Xhaka sjellin përvojë te Milani
Reprezentuesi zviceran do të mbushë 33 vjeç në shtator dhe është nën kontratë me Bayer Leverkusen deri në qershor 2028, por mund të jetë i disponueshëm për çmimin dhe projektin e duhur.
Sipas gazetarit Matteo Moretto, Milani është në fazat fillestare të një qasjeje për Xhakën, por është ende herët dhe nuk ka pasur ende kontakt direkt.
Ish-lojtari i Arsenalit ka zhvilluar 49 paraqitje këtë sezon për Bayer Leverkusen, duke kontribuar me dy gola dhe shtatë asistime.
Xhaka, një veteran tjetër në listën e dëshirave të Milanit / shkruan Gazeta Online Reporteri.net.
