Prada njoftoi të enjten se ka hyrë në një marrëveshje përfundimtare për të blerë 100 për qind të Versace nga Capri Holdings. Blerja do të bazohet në një vlerë të ndërmarrjes prej 1.25 miliardë euro.
Që nga viti 2018, Versace është në pronësi të Capri Holding, një kompani shumëkombëshe e modës e themeluar në vitin 1981 nga stilisti amerikan Michael Kors.
Patrizio Bertelli, kryetari i Grupit Prada, shprehu entuziazmin për këtë marrëveshje, duke theksuar angazhimin për kreativitet dhe artizanat. Ai po ashtu theksoi se organizata është e gatshme të përballet me sfidat e reja të markës.
Prada ka negociuar për muaj të tërë për të blerë shtëpinë e modës të themeluar nga Gianni Versace në vitet 1970 dhe e njohur për modelet e saj të ndezura dhe të gatshme për t’u veshur.
Donatella Versace, e cila ka udhëhequr markën për 28 vjet, u emërua ambasadore e markës, ndërsa Dario Vitale, ish-anëtar i Miu Miu, u emërua drejtori kreativ. Në vitin 2018, Donatella kishte arritur një marrëveshje për të shitur Versace te Michael Kors Holdings, që tani është Capri Holdings.
Lajmin e ka komentuar edhe Donatella Versace me një postim në Instagram, duke shprehur gjithë vlerësimin e saj për Miuccia-n dhe familjen e saj dhe është deklaruar entuziaste për këtë kapitull të ri të shtëpisë së modës.
“Jam absolutisht e lumtur që Versace do të bëhet pjesë e familjes Prada. Gianni dhe unë kemi pasur gjithmonë një admirim të madh për Miuccia, Patrizio dhe familjen e tyre. Jam e nderuar që kam markën në duart e një biznesi familjar italian kaq të besuar dhe jam gati të mbështes këtë epokë të re për markën me çdo mënyrë që të mundem.”, shkruan Donatella në postimin e saj.
Një kapitull i ri në modën italiane, Prada njofton se do të blejë shtëpinë e modës Versace për 1.25 miliardë euro / shkruan Gazeta Online Reporteri.net.
