Kryeministri i RMV-së, Hristijan Mickoski sot në Mynih u takua me kryetarin e Këshillit Evropian, Antonio Kosta.
Në takim, siç njoftojnë nga kabineti qeveritar, është diskutuar për integrimet evropiane, për përpjekjet dhe koncesionet që janë bërë në këtë drejtim, si dhe për nevojën që përfundimisht të hapen dyert për BE-në.
Mickoski theksoi se vendi meriton të ecë përpara dhe në fund të mos mbetet peng i mosmarrëveshjeve dhe pengesave bilaterale, të cilat në të kaluarën ka pasur shumë.
“Në këtë drejtim, Maqedonia ka bërë shumë dhe Bashkimi Evropian duhet të tregojë gatishmërinë e tij për ta vlerësuar atë në mënyrën e duhur, e kjo është me dinamizimin e procesit të negociatave me Bashkimin Evropian”, theksoi Mickoski.
Ai theksoi se Qeveria është e përkushtuar fuqishëm në reformat në drejtësi, dhënien e drejtësisë dhe luftën kundër krimit të organizuar, gjë që kërkon mbështetjen dhe mobilizimin e të gjithë aktorëve shoqërorë.
Mickoski theksoi se qëllimi parësor është lufta për standardin e jetesës së qytetarëve dhe një jetë më të mirë, e cila do të arrihet përmes inovacionit, investimeve dhe edukimit të fortë./Telegrafi/
Mickoski–Kosta: Maqedonia meriton të ecë përpara dhe të mos jetë peng i mosmarrëveshjeve dypalëshe appeared first on Telegrafi.
