Ruben Amorim zemëroi tifozët e Manchester United me një koment të tij pas humbjes 3-1 ndaj Brighton-it. Jamie Carragher reagoi ashpër ndaj deklaratës “qesharake” të Ruben Amorim pas kësaj humbjeje, të cilën e bëri në konferencën për shtyp të së dielës.
“Djajtë e Kuq” kishin dhënë shenja përmirësimi me dy paraqitje mbresëlënëse si mysafirë kundër Liverpool-it dhe Arsenal-it, përpara se të përmbysnin rezultatin dhe të fitonin 3-1 ndaj Southampton-it, skuadrës në fund të tabelës, të enjten.
Megjithatë, United u dominua plotësisht nga Brighton-i në Old Trafford dhe tani ka fituar vetëm dy nga 10 ndeshjet e fundit në Premier League, duke u renditur në vendin e 13-të.
Në një moment frustrimi, Ruben Amorim habiti tifozët kur deklaroi se skuadra aktuale është më e dobëta në historinë e lavdishme të Manchester United.
“Po marrim një trajner të ri që po humb më shumë se trajneri i mëparshëm”, tha ai në konferencën për shtyp. “E kam të qartë këtë”.
“Ne jemi skuadra më e dobët ndoshta në historinë e Manchester United. E di që ju [media] doni tituj, por po e them këtë sepse duhet ta pranojmë këtë fakt dhe të ndryshojmë. Ja ku i keni: titujt tuaj.”
Komentet shkaktuan reagime të shumta dhe në Monday Night Football të Sky Sports, Jamie Carragher nuk i kurseu kritikat.
Ish-mbrojtësi i Liverpool-it shprehu kundërshtimin e tij ndaj deklaratave të Amorim dhe sugjeroi se Sir Jim Ratcliffe dhe grupi INEOS do të kenë biseduar me të për ato që tha publikisht.
“Nuk e kuptoj pse e tha atë. Dukej sikur kishte një buzëqeshje kur e tha – pothuajse e kuptoi peshën e fjalëve të tij”, deklaroi Carragher.
“Nuk e di çfarë po përpiqet të arrijë me këtë. Manchester United humbi një ndeshje në shtëpi ndaj Brighton-it; sapo kemi bërë një grafik – kjo ka ndodhur që dy vite radhazi”.
“Që një trajner të bëjë një deklaratë të tillë, nuk më vjen keq për lojtarët sepse gjysma e tyre janë qesharakë gjithsesi, por do të isha shumë i befasuar nëse drejtuesit mbi të nuk kanë pasur një bisedë të ashpër me të. Nuk flitet kështu si trajner i Manchester United”.
Amorim gjithashtu shqetësoi tifozët në intervistën e tij pas ndeshjes kur tha se nuk do të ndryshojë stilin e tij dhe pranoi se lojtarët dhe tifozët “do të vuajnë” para se të vinë të rezultatet.
Manchester United do të rikthehet në fushë të enjten kur pret Rangers në Europa League, përpara se të udhëtojë drejt Fulham-it në Premier League të dielën./Express
Jamie Carragher e “çmonton” trajnerin e United, e quan qesharak / shkruan Gazeta Online Reporteri.net.
