Në buxhet ka para për rritjen e pagës minimale në dhjetor, siç kërkohet nga Sindikata, përveç rritjes ligjore prej 2000 denarë në mars të vitit të ardhshëm. Ministri i Ekonomisë, Besar Durmishi, thotë se dëshiron që paga minimale të rritet në 600 euro, por duhet marrëveshje dhe ndryshime ligjore për kërkesën e Sindikatës që paga minimale të jetë fillimisht 450 euro.
“Nëse në kuadër të Këshillit Ekonomiko-Social biem dakord për rritjen e pagës minimale, së pari duhet të ndryshohet Ligji për pagën minimale. Kur të bëhen ndryshimet, paga minimale mund të rritet në 450 euro. Ka vullnet politik. Ndërsa unë dua që paga minimale të jetë 600 euro”, tha sot ministri Durmishi, duke iu përgjigjur pyetjeve të gazetarëve në konferencën “Menaxhimi i mungesës së fuqisë punëtore në profesione të caktuara në Maqedoninë e Veriut”.
Këshilli Ekonomik dhe Social do të vendosë nëse paga minimale mund të rritet në 450 euro në seancën e dhjetorit.
Kryetari i Lidhjes së Sindikatave të Maqedonisë (LSM), Sllobodan Trendafilov, thotë se argumentet janë në anën e tyre.
“Nëse e dini se 800 euro është paga minimale në Mal të Zi, në Bosnjë do të jetë 600 euro nga 1 janari, ndërsa në Serbi është 450 euro, pagat këtu duhet të rriten. Ne jemi duke e diskutuar këtë çështje dhe mendoj se në seancën e radhës të Këshillit Ekonomik dhe Social do të paraqesim argumentet tona për t’i bindur për nevojën e rritjes së të gjitha pagave, si dhe atë minimale”, tha Trendafilov.
Durmishi: Unë dua që paga minimale të jetë 600 euro, por fillimisht do të negociojmë për 450 euro appeared first on Telegrafi.
