Neurologia Merita Ismajli-Marku është e ftuara e radhës në emisionin “PodGo” me të cilën kemi diskutuar për tema të ndryshme, sidomos ato të shëndetit mendor. Ajo tha se shëndetit mendor është çështje vitale, duke shtuar se si shoqëri nuk jemi të përgatitur për ndryshimet e mëdha teknologjike.
Megjithatë ajo sheh pozitivitet për të ardhmen e shoqërisë, duke pasur parasysh ndryshimet dhe zhvillimet në botë.
“Shëndeti mendor është çështje vitale. Me ardhjen e teknologjisë, mediumeve, hapjes së botës, kjo ka sjellë ndryshime të mëdha në jetën e të gjithëve sidomos tek shoqëritë tradicionale. Është e vështirë të përshtatës në këtë proces të ndryshimeve të mëdha. Të gjitha këto ndryshime teknologjike nuk shkojnë me kapacitetin tonë mendor dhe emocional. Unë për këtë çështje ua rekomandoj të gjithëve librin “21 lesson for 21 century”. Ky libër i përmbledh të gjitha problemet moderne dhe u jep përgjigje. Ne nuk jemi të përgatitur për këto ndryshime të mëdha dhe ne vuajmë në shëndetin mendor. Kemi përparuar pak, por megjithatë nuk flitet sa duhet.
“Pas krizave të kaluara, u tregua që sëmundjet e shëndetit mendor u rritën. Unë mendoj se nga ajo që shkruhet, do të vuajmë ende, pasi siç e thash, nuk jemi të përgatitur për zhvillimet e shpejta. Por në anën tjetër të gjitha këto ndryshime do të kenë edhe lehtësime, pasi nuk është çdo gjë negative në zhvillimin teknologjik. Mendoj se do të ketë baraspeshë dhe nuk e shoh aq të pashpresë shoqërinë sa i përket shëndetit mendor”, tha mes tjerash Merita.
I kërkuam edhe këshilla për prindërit e rinj, se si të rrisin fëmijët e tyre, ajo tha se duhet të ketë filtra në informacionet që i marrin fëmijët.
“Do të duhej të vendosen rregulla që të ketë kontroll apo filtra të përdorimit të informatës në bazë të moshës. Nuk mund që një 8-vjeçar të ketë pa kufi informacione, vrasje dhe përmbajtje seksuale, pasi ai humbet në ato. Mendoj që filtrat janë të domosdoshme. Gjithashtu sa më vonë me ua dhënë telefonat fëmijëve, si dhe të kalojnë kohë cilësore me fëmijët”.
Kurse në lidhje me të rinjtë, ajo i ftoi që të angazhohen në punë, pasi siç tha, ajo të fisnikëron.
“Gjeneratat e mëparshme puna ka qenë motivi kryesor dhe burimi i çdo kënaqësie. Ne kemi jetuar për të arritur diçka në jetë. Me fëmijët tanë, ndoshta pa dashje, kemi gabuar pasi iu kemi dhënë komoditet të tepërt, pasi të rinjtë tanë rriten me të gjitha të mirat, dmth i mbrojmë nga të gjitha sfidat dhe ua plotësojmë të gjitha dëshirat. Është e rëndësishme që të rinjve t’u jepen obligime dhe punë. Është e domosdoshme puna, pasi ajo të fisnikëron”, tha Merita.
Ajo iu bëri thirrje të gjithëve që kanë probleme shëndetësore, që të kërkojnë ndihmë profesionale dhe të mos dëgjojnë të tjerët./Telegrafi/
*Ky emision mundësohet nga Porsche, KFC, Neotel, CityFashion, Ujë Rugovë, Zgjimi dhe Uniqa.
Neurologia Merita Ismajli-Marku: Për çdo problem shëndetësor kërkoni ndihmë të profesionistëve appeared first on Telegrafi.
