Prokuroria Themelore Publike në Shkup ka ngritur aktakuzë kundër një personi për veprën penale nxitje e urrejtjes, përçarjes ose intolerancës në bazë të bazave kombëtare, racore, fetare dhe bazave të tjera diskriminuese sipas nenit 319 paragrafi 1 i Kodit Penal, thuhet në njoftimin e PTHP-së, përcjell Telegrafi Maqedoni.
“Në procedurën paraprake të zhvilluar, prokurori publik ka siguruar prova që vërtetojnë bazat e dyshimeve se i akuzuari ka kryer veprën penale kundër një anëtari të bashkësisë hebraike – drejtor i Fondit të Holokaustit të Hebrenjve në Maqedoni.
Më 26.12.2024, para ambienteve të Fondit në rrugën “11-ti Mart” në Shkup, ndërsa i dëmtuari po kryente detyrat e tij të punës, i akuzuari, i cili ishte agresiv, kaloi pranë hyrjes.
Ai e ktheu shikimin drejt të dëmtuarit me zemërim dhe urrejtje dhe filloi të gjestikulonte dhe të bërtiste përshëndetje naziste, të shante dhe të përdorte fjalë ofenduese në gjermanisht. Pastaj u përpoq të largohej, por i dëmtuari menjëherë iu afrua një automjeti policor aty pranë dhe e denoncoi.
Kur oficerët e policisë iu afruan të akuzuarit 59-vjeçar për ta identifikuar, ai vazhdoi të kërcënonte, duke bërë që i dëmtuari të ndihej i kërcënuar, i pasigurt dhe i frikësuar, dhe u tërhoq në ambientet e muzeut”, thuhet në njoftimin e Prokurorisë./Telegrafi/
