Ministri i Transformimit Dixhital, Stefan Andonovski, sot prezantoi Strategjinë e re Kombëtare për Teknologjitë e Informacionit dhe Komunikimit – “SMART/MK 2030”, me të cilën Maqedonia, pas tetë vitesh, më në fund merr një plan modern dhe gjithëpërfshirës për zhvillim dixhital.
“Ky dokument është një udhërrëfyes për mënyrën se si vendi ynë do ta arrijë të ardhmen e tij dixhitale në përputhje me vlerat dhe standardet evropiane për Dekadën Dixhitale 2030, por edhe me vizionin dhe nevojat maqedonase”, theksoi Ministri Andonovski.
“SMART/MK 2030” është një dokument kombëtar, pjesë e një axhende më të gjerë dixhitale evropiane për zhvillim.
Si vend kandidat, Maqedonia pranon kornizën e Dekadës Dixhitale Evropiane, e cila parashikon katër qëllime deri në vitin 2030: qytetarë të trajnuar dixhitalisht dhe ekspertë të kualifikuar të TIK-ut, infrastrukturë e sigurt dhe e lidhur, shërbime publike të dixhitalizuara, biznese të integruara dixhitalisht.
“Strategjia jonë ndjek drejtpërdrejt këto prioritete evropiane. Ajo forcon konvergjencën institucionale me shtetet anëtare, krijon mundësi për pjesëmarrje në programet dixhitale evropiane dhe mundëson qasje në instrumente financiare dhe ndihmë teknike nga Bashkimi Evropian. Me të, ne bëhemi pjesë aktive e komunitetit dixhital evropian – si një partner që kontribuon me njohuritë, zgjidhjet dhe inovacionet e veta”, tha Ministri Andonovski./Telegrafi/
