Mesatarisht, çdo ditë pothuajse një MW i ri në katër vitet e fundit është lidhur me sistemin e energjisë, tregojnë të dhënat e Komisionit Rregullator për Energjetikë (KRRE). Deri në tetor (2022 – tetor 2025), në Maqedoninë e Veriut janë ndërtuar kapacitete të reja që prodhojnë energji elektrike nga burimet e rinovueshme me një kapacitet të instaluar total prej 1.200 MW, tha kryetari i KRRE-së, Marko Bislimoski, në Konferencën rajonale për transformimin e gjelbër të Ballkanit Perëndimor, e cila u mbajt në Tiranë, Shqipëri.
“Prodhimi i energjisë elektrike nga dielli është një realitet – Eldorado i centraleve fotovoltaike njoftoi tranzicionin energjetik, i cili, nga ana tjetër, hapi një proces transformimi të sektorit të energjisë elektrike. Numrat janë inkurajues, por periudha që vjen është plot me sfida, dhe njëra prej tyre është balancimi i sistemit kur bëhet fjalë për energjinë elektrike të prodhuar nga burime të rinovueshme. Duhet të veprojmë në këtë fazë dhe të inkurajojmë investimet në kapacitetet energjetike që do të prodhojnë energji bazë. Sigurisht edhe përdorimi i baterive ka rolin e vet, por është e nevojshme të realizohen investime që do të zëvendësojnë prodhimin e energjisë elektrike nga qymyri me gaz ose biomasë”, theksoi Bislimoski.
Digjitalizimi i proceve administrative në marrjen e lejeve dhe dokumenteve të përcaktuara si parakusht për rritjen e numrit të investimeve ishte një nga mesazhet kryesore të pjesëmarrësve në Panelin kushtuar “Si të krijohen zona për realizimin më të shpejtë të investimeve të gjelbra”.
Siç informon KRRE, folësit, përfshirë ekspertë të energjetikës, ekonomistë dhe zyrtarë nga qeveria ekzekutive dhe lokale e vendit nikoqir, thanë se tranzicioni energjetik do të jetë i suksesshëm vetëm nëse edhe amvisëritë i ndiejnë efektet, dhe jo vetëm industria. Masat dhe reformat për një të ardhme të zgjuar të energjisë së gjelbër duhet të jenë qëllimi i politikave që udhëheqin vendet e rajonit për një integrim më të lehtë me tregun evropian të energjisë.
